Flottræfilsháttur?

Sælt veri fólkið.

Ég hef lengi verið að velta fyrir mér þróuninni í húsagerð  hér á landi.

Ekki eru liðin nema rösk 100 ár frá þvi að við skriðum grálúsug út úr 

torfkofunum. Þar sem ég starfa í þessum bransa og hef gert alla mína 

hundstíð kemst ég ekki hjá því að fylgjast með þeim breytingum sem orðið hafa.

Í dag þjóta upp einbýlishús frá 500 - 700 fm. og þykir ekkert tiltökumál.

Inn í þessi gýmöld flytur síðan 4 manna fjölskylda eða svo.

Fyrir mann eins og mig sem bjó sem krakki í braggahverfum (Kamp Knox)

sem flestir þekkja úr myndinni Djöflaeyjan, er þetta svo yfirgengilegt, að

mig skortir oft orð. Lúxusinn og flottheitin eru ævintýri líkust.

Er virkilega svona mikill peningur í umferð eða eru þetta hreinir stælar?

Fyrirmyndin er að sjálfsögðu hið opinbera eins og sendiráðsbyggingar

um allan heim sýna. Nú, okkur nægir að horfa á glerhallirnar hér í borg og

ætla ég sérstaklega að benda á klúðrið og peningahítina sem hið væntanlega

tónlistarhús mun verða. Þar fá arkitektar og verkfræðingar að leika sér með 

glerhleðslur upp á milljónir ÁÐUR en byggingin hefst.

Enn eitt atriði, sem engin hefur rætt um og gert hefur mig gáttaðann.

HVAÐA erki-hálfvitar taka upp á því að reisa GLERHÖLL nánast úti í sjó?

Er enginn af þessum snillingum meðvitaður um NORÐAN ÁTTINA á svæðinu?

Hafa menn áttað sig á því að þarna er búið að skapa fulla vinnu fyrir glugga-

þvottamenn um alla framtíð. Þetta verður eins og Golden Gate brúin. Um leið

og búið er að þrífa saltskítinn af glerinu, þarf að byrja aftur. Hefur einhver reiknað út 

þennan kostnað? Örugglega ekki. 

Sæl að sinni. 

Ábyrgð.

Alþingismenn sem fitjuðu upp á trýnið í heilagri vandlætingu yfir kröfum margra,

um að erlent vinnuafl og fleiri gengju undir læknisskoðun við komuna hingað til lands,

skulu hér með skammast til þess að taka fulla ábyrgð á framkomu sinni. Þeir sem koma

til með að veikjast af þessum óþverra skulu láta þá sæta ábyrgð á framkomu sinni. 

 

Kom berklasmitaður til Íslands

Dótadella.

Sælt veri fólkið.

Alveg var dásamlegt að heyra í 11-fréttum Bylgjunar á föstudagsmorgni síðasta.

Gissur fréttamaður átti bágt með sig, er hann tilkynnti okkur sem á hlustuðum, að

starfsmenn dótabúðarinnar Toys'r'us hefðu þurft að  opna verslunina klukkutíma fyrr 

en ætlað var. Ástæðan? Fólk var mætt eldsnemma, í röð við dyrnar vegna "Tilboða".

Veðrið var nánast við fellibylja styrk hvað vind snerti, en samt var hópur fólks mættur

á svæðið. Var það farið að fjúka fram og til baka á planinu en samt hékk það á hurðum

og öllu sem hönd á festi.

 Það ætlaði sko aldeilis að fórna lífi og limum fyrir plastdraslið sem verið var að

selja aðeins ódýrara en annarsstaðar. Ég veit ekki hvort ég á að hlægja eða gráta yfir

þessum vesælu sálum sem skúruðu planið í sturluðu veðri fjúkandi um eins og laufblöð.

Hvert erum við komin í fáviskuni, þegar plastrusl er orðið skynsemini yfirsterkari? Hvað

er að brjótast um í höfðinu á svona fólki? Þetta er klárlega rannsóknarefni fyrir 

einhverja fræðingana þarna úti. Ekki eru þetta blankir einstaklingar, því þetta er töluvert

ferðalag, og venjulegt fólk þarf nú að stunda vinnu, ekki satt? Ég bara spyr!

Sæl að sinni. 

 

 

Veðravíti.

Sælt veri fólkið.

Ég var ekki fyrr búinn að tjá mig um  myrkrið og rigninguna í síðustu færslu,

þegar skall á bandbrjálað veður um síðustu helgi. Rétt sluppum fyrir 

Hafnarfjallið á leið úr Borgarfirðinum í bæinn.

Nú sit ég og hlusta á storminn berja á húsinu, eina ferðina enn, og stefnir í

enn brjálaðra veður en þá. Halló, 2 svona lægðir á einni viku. Hvað er í gangi?

Ég tók sérstaklega eftir því, síðasta vetur,  hvað lægðirnar voru djúpar og

hvassar og rifu hraustlega í. Nú virðast þær koma með styttra millibili

og hálfu verri ef eitthvað er. Ég er hræddur um að nú verði mannskepnan

að fara að opna augun og íhuga sín mál. Þá meina ég, að fara að haga sér eftir 

aðstæðum hverju sinni. Það er með ólíkindum að vera að mæta bílum með

kerrur og aðra aftanívagna, í kolvitlausu veðri, á þjóðvegum landsins.

Það er bara haldið af stað og ekkert hugsað. Lausamunir eru látnir liggja 

hér og þar, eins og á byggingasvæðum t.d. Þetta veður er komið til að vera.

Það virðist því miður vera raunin. Skelfileg tilhugsun. Þetta er farið að nálgast 

fellibyljastyrkinn. Þurfum við virkilega að fara að endurskoða styrkleikann á t.d. 

sumarhúsum?  Ekki þessi 300 ferm. einbýlishús, heldur er ég að meina

sumarhúsin sem við almenningur verðum að láta okkur nægja.  Ég bara spyr.

 

 

 

Ljós í myrkrinu.

Sælt veri fólkið.

Ég hef verið að velta því fyrir mér hvernig fólki líði svona almennt í þessu

foráttu myrkri og rigningu. Þetta er búið að vera svona í tæpa 3 mánuði.

Ég fer að skilja það núna af hverju fólk verslar sem aldrei fyrr ferðir til Spánar 

og suður evrópu í svartasta skammdeginu. Hér hefur myrkrið grúfað yfir endalaust,

mígandi rigning, og engin friður til útiveru. Ekki það að ég sé einhver sérstakur útivista-

maður, en ég vill gjarnan geta séð lengra en í gráann þokubakkann. Ég verð að gæta

þess að leggjast ekki í eitthvað þunglyndi, en það er erfiðara en fjandinn sjálfur að

forðast það.  "Nú, jólin eru að koma", gæti einhver sagt. Jahá, blessuð jólin. Auðvitað maður!

Það bjargar öllu.  Fara að huga að jólagjöfunum, þvælast 

í mannmergðinni, teymdur áfram af konunni eins og hundur í bandi. Kaupa þetta, kaupa hitt.

Þrífa, mála, hengja upp jólaskrautið. Hvað á að vera í matinn? Hvað verðum við með marga í mat?

Eh, er þetta ekki farið að kosta svolítið? Skiptir engu, það er yfirdráttarheimild á kortunum. 

En, afhverju gerum við ekki bara eins og þeir sem fara til Kanarí, eða eitthvað? Sleppum 

þessu veseni og látum aðra stjana í kringum okkur. Ertu galinn? Og missa af yndislegum samveru

stundum með fjölskyldunni!!!!! (Í eldhúsinu við matargerð og uppvask)

Svei mér þá. Það er búið að redda mér út úr skammdegis þunglyndinu.

Ég hlakka til. 

Brjálæðingar

Sælt veri fólkið.

Ég hef opnað þessa síðu til að geta tjáð mig um heima og geyma en aðallega     

til að létta aðeins á innri þrýstingi.

Nú vill svo til að ég má kallast stálheppinn að vera yfir höfuð að pikka inn

þessar línur hér. Það eru 2 vikur síðan að ég var staddur á gatnamótum í

grennd við Umferðamiðstöðina. Klukkan var á fimmta tímanum seinnipartinn

og brjáluð umferð. Við sem biðum eftir að komast inná nýju Hringbrautina

fáum ljós og ég tek af stað. Horfi ég allt í einu á stálvegg æða fram hjá 

húddinu á bílnum mínum. Ég negli niður og stari eins og hálfviti á risa trukk

æða á geðveikri siglingu yfir gatnamótin. Til að bæta gráu ofan á svart,

er tengivagn af stærstu gerð aftan í flykkinu og á honum VALTARI. 

Hvað skyldu þetta hafa verið mörg tonn sem æddu yfir á rauðu ljósi í

MIÐBÆ Reykjavíkur á há anna tíma. 40? Sem betur fer náði ég númeri

tengivagnsins og tilkynnti lögguni um þessa morðtilraun. AHA heyrði ég hann

segja. Þessi er frá Loft Orku. Nú spyr ég......  Fær hvaða brjálæðingur sem er að

taka meirapróf? Vita þessir óðu hundar sem keyra þessi flykki hvaða  vegalengd

þarf til að stöðva þau? Já, ég tala í fleirtölu, vegna þess að ég byrjaði að fylgjast 

sérstaklega með þessum vígvélum í umferðinni. Mér er illa brugðið eftir að ég uppgötvaði

að brjálæðingarnir telja sig yfir umferðarlögin hafna. Á hverjum einasta degi frá þessu

atviki, í 2 vikur, horfi ég á þessa risatrukka æða aftur og aftur yfir á rauðu ljósi. 

Ekki nóg með það, heldur horfði ég upp á 2 sturlaða ökumenn á FULLHLÖÐNUM

malarflutningabílum, hvor á eftir öðrum, æða niður Breiðholtsbrekkuna, á vinstri akreininni,

á öðru hundraðinu. Eru þetta krakka idjótar nýskriðnir úr meiraprófinu eða brjálæðingar

með nefið fullt af amfetamíni? Ég á konu og börn sem eru  í umferðinni alla daga.

Ég er orðinn það áhyggjufullur af þeim, innan um þessa brjálæðinga, að  ég stirðna í hvert

sinn sem ég heyri í sírenum sjúkra- eða lögreglubíla. Nú skil ég óttann erlendis þegar

raðmorðingar ganga lausir. Það veit enginn hvar þeir drepa næst. 

Þegar þú getur ekki lengur treyst á að vera öruggur á grænu ljósi á gatnamótum,

er fokið í flest skjól. Ég krefst þess að lögregla fari að fylgjast sérstaklega með þessum 

óðu hundum og hvet ALLA ökumenn og vegfarendur að tilkynna straks öll svona atvik.

Líðum ekki þessum vitfyrringum að vera með morðtilraunir út um alla borg. 

Ég veit að það er ekki hægt að dæma svona heila stétt ökumanna, en það er 

óhuggulegt að hafa orðið vitni að svona miklum fjölda brota á svo skömmum tíma.

Ég skora einnig á reyndari ökumenn innan stéttarinnar að ræða þessi mál af alvöru við

þá glanna sem þeir þekkja innan síns hóps.  

Sæl að sinni.